اجمل قصائد مجبل الحشاش : Tyl55

مجبل الحشاش هو شاعر وطنى واجتماعى وشاعر غزل وله الكثير من القصائد الجميله وللتوضيح اكثر
هو: معد ومقدم برنامج لوحات شعبيه فى تلفزيون دولة الكويت
هو: مخرج برنامج فنون واشعار بالاذاعه
هو:عضو جمعية الصحفين الكويتيه
هو: عضو فى ديوانية شعراء النبط
هو:محرر وصحفى سابق فى جريدة الانباء الكويتيه
ومعد حاليا صفحة حروف المشاعر جريدة النهار الكويتيه
واصدر شاعرنا المحبوب ديوانه الاول ( اسرار مكشوفه فى عام 1988 )
والديوان الثانى ( قصائد خاصه عام 1993 )
زاوية شاعر الاسبوع تختاره لهذا الاسبوع

قصيده ايام ازمة الخليج

سافرت أدور راحت النفس ياحمود
مير المصيبه من السفر ماستفدنا

والحظ في بعض التصاريف مفقود
ياليتنا بكويتنا مابتعدنا

سمعتلي علم بالأخبار موكود
تدهورت الأوضاع داخل بلدنا

عدونا وسط البلد صار موجو
الكاولي بالليل جيشه هجدنا

طوق بلدنا في صواريخ وجنود
وزعزع جيوش كويتنا اللي حشدنا

رد الجمايا ناكر الطيب بجحود
عقب الكرم والطيب ينكر عهدنا

يومه لنا محتاج حنا له أسنود
واليوم أشوفه بالعداوه قصدنا

والله قهر والصبر ياحمود محدود
قلي وشلون وضع أهلنا بعدنا

الشعب كله داخل البيت محشود
ممنوع يطلع حسب ماهو وردنا

نطلع من الفندق من الضيق وأنعود
مهما طلعنا ضيق والآ قعدنا

ياحمود عن شوف البلد صرت مردود
مير البلا ياحمود شاللي بيدنا

معاد تقبلنا مطارات وحدود
والله مصيبه وعن بلدنا طردنا

كويتنا ياحمود هي منبع الجود
هي أمنا هي دارنا هي سندنا

نبذل ورا أخبار البلد كل مجهود
نسمع علوم ونعطي إللي نشدنا

يالله يارب الملا خير معبود
ياواحدٍ حنا عليك أعتمدنا

أنك ترد أبلادنا سود وامهود
والظالم أتحطم جيوشه من أدنا

وترجع بلدنا مثل ماكان معهود
وترجع حكومتنا ويكمل عددنا

وغير الصباح مالنا فيه مقصود
يسلم لنا جابر يسلم سعدنا

إللي كرمهم بين الأقطار مشهود
وحنا لهم بالحب نوفي وعدنا

والخاتمه يالله عسى كويتنا تعود
بأمر الولى والخير ترجع بلدنا

هالحين توك تجي عقب الغياب الطويل
توك تذّكر غلاي ورغبتك بالوصال

هالحين توك تقول ان الصبر مستحيل
هالحين عقب البطى حطيتني راس مال

وينك يوم إن المدامع من فراقك تسيل
وينك يوم إن المشاعر لك تنادي تعال

وينك يوم إن الزمن صار بوصالك بخيل
وينك يوم إن التسامح والعذر له مجال

وينك يوم إنك لروحي في المحبة عديل
وينك يوم إنك تغار من البطى بإنفعال

وينك يوم إنك بقربك عندي اغلا خليل
وينك يوم إني قبل معطيك حب ودلال

هالحين صار الزمن في ترك حبك كفيل
هالحين مات الشعور اللي بقلبي وزال

هالحين حتى كلامك صار دمه ثقيل
ماهو مثل قبل عندي بالحلا والجمال

الله يحسبي عليك اللي نكرت الجميل
ضحيت في حبك اللي كان كبر الجبال

طولت بالبعد لين إن الغلا جا قتيل
والبعد لاطال يمحى الحب مابه جدال

طولت في غيبتك واليوم هذا الحصيل
جا في المحبة برود وقبل كان إشتعال

الحين ما عاد يرجع حبنا يا جميل
هذا غلا والغلا ماهو بروح وتعال

عقب الكثير بغرامك ما اقتنع بالقليل
من عاش بالزود صار النقص عنده محال

وقتٍ قضيته معك في الحب ماله مثيل
ضيعّت لذة هواه وطعت قيلٍ وقال

كنت أحسب إن الزمن لو مال بك ما تميل
لكن طلعت الضعيف اللي مع الوقت مال

راجع غرامك قبل واليوم واخذ الدليل
شاللي تشوفه بوضعك من يمين وشمال

اليوم صار الصبر عندي لحبك بديل
ان جيت وان رحت صار الوضع عندي عدال

عش في غيابي مثل ما عشت عقبك عليل
ولا أشتقت حاول تذكر ماضيات الليال

أما الرجوع لهوانا قبل ماله سبيل
دامك صبرت أول إصبر خل معك إحتمال

واصل غيابك وكمل نيتك بالرحيل
دام المحبة قضت مالك ومال الوصال

اخذي جميع اللي تبين وعطيني
مجال اعبر عن هوى النفس وارتاح

ابشرح اللي داخلي وافهميني
يمكن عذابي لاتكلمت ينزاح

بقدم اعجابي ولا تواخذيني
ترى الولع في بعض الاحيان ذباح

لاتواخذيني جاملي واسمعيني
حتى ولو كنتي على ضحك وامزاح

انا اندفعت بعاطفه قدريني
راعي شعوري ولا تزيديني اجراح

صبري نفذ ماعاد هو في يديني
حاولت اخفي لكن الشوق فضاح

ماني ضعيف بعزتي صدقيني
بس المشاعر تجذب الشخص لاطاح

والنفس لا حبت تراها تليني
يطيح صاحبها ولو كان نطاح

وانا وقعت من الولع ساعديني
ياللي جبينك بارقن بالدجى لاح

تكرمي يافاتنه وانقذيني
مدي يدينك تبتدي دنيا الافراح

تعالي بعمرن بقى شاركيني
العمر مره واكثر العمر قد راح

الختاميه لــشاعرنا

أنا سما وأنتي مثل واطي الارض
مهما كبرتي بالمساحات تحتي

افرض عليك اللي يبي خاطري فرض
اذا سمحتي او بعد ماسمحتي

مهما مشيتي لي على الطول والعرض
انشهد انك خاسره ماربحتي

بالكذب من بنك الدجل ماخذه قرض
وبالصدق ماعمرك بكلمه فلحتي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s