: سالفة وقصيدة – الشاعر حمد بن وازع المطيري

مشاهدة النسخة كاملة : سالفة وقصيدة – الشاعر حمد بن وازع المطيري

في زمان الشيخ / جعيلان بن نايف بن ســويط كان فيه شخص اسمه حمد بن وازع من الجبلان من مطير
صارت عليه مشكلة مع بني عمه المطران وجلا يم السويط وجاورهم مدة من الزمن
وقام السويط باكرام ابن وازع غاية الاكرام واحسنوا مقامه عندهم وتقريب مجلسه في مجالسهم
وبعد وقت طويل انتهت سالفة ابن وازع مع بني عمه ورجع لدياره وبعد فترة ارادوا مطير ان يغزوا على الظــفير
وكانت عند ابن وازع ذلول مشهورة وطيبة وكان ابن عمه يريد ان يشترك بالغزو لكن لايملك ذلول
وذهب لابن عمه حمد وطلبه الذلول ليغزي عليها فرفض ابن وازع ان يعطيه لانه يرى ان الظفير والسويط خاصة
لهم موقف طيب سابق معه فحلف له ابن عمه انه ما نيتهم الظفير ..
وخذا الذلول وغزوا الظفير وصارت المعركة وكانت الغلبة للظفير ومن بين الكسب ذلول ابن وازع الطيبة
وجابوها الظفير للامير / جعيلان بن نايف بن ســويط رحمه الله لانها اطيب ناقة وارادوا ان تعطى لشيخهم
فلما سمع حمد بن وازع الجبلي بالعلم ركب ونصا ابن سويط يطلب ذلوله اللي خذوها الظفير
مع علمه ان الذلول المغيره لا تعاد ، فتوسل اليهم بهذه القصيده المؤثرة

قال حمد بن وازع :

ياراكب من فوق فـج العضـودي=قطم الخفوف ومبعدات المصابيـح
ما كعمـوا مرباعهـن بالنفـودي=يرعن بالصلب الحمر والصحاصيح
ثلاثة اشهر مااوجسـن البـدودي=يتلن اخو هيلا وهلهـن مصاليـح
وان روحن يشدن بيض الخـدودي=ليا زان موماهن وصكتهن الريـح
حثوا عليهن من رقـاق الحيـودي=حثوا عليهن بالسـرى والمصابيـح
تلفـون بيـت للقبايـل عـمـودي=ابو غنيـم اللـي عليـه التماديـح
جعيلان بن نايف عريب الجـدودي=كل المشاور غير شـوره مدابيـح
اشقر خفيف الريش ماهو جرودي=من ماكر تظهـر تبوعـه ذوابيـح
لازم تجون احمود *حرز الشرودي=فكاك بالضيقـات شقـح ملاويـح
وابكرتي مـن بينكـم يالجنـودي=راحت فوت ماجا عليها سواميـح
وابكرتـي وان وردوا للـعـدودي=تشرب صراة العد ما تنقر الريـح
من يوم نوخـت امهـا للقعـودي=واليوم عوصا تسبق الفطر الفيـح
قصيركم من يوم بنيـت عمـودي=معكم ولد واليوم شيبـي ملاويـح
عنزتهـا حيـد طويـل الحيـودي=والرس ما يسقي الظوامي الى ميح
من طاع هرج المنسدح والحسودي=يموت ما يقوى على هبت الريـح

ويوم سمع ابن سويط هالقصيدة قال: ياحمد والله ان مالك حق عندنا ذلولك مغيرة علينا واخذناها بحد السيف
لكن عن قصيدك بنا وقصرتك وخوتك لنا تستاهلها ..عطوه ذلوله يالظفير …)
فاعادوها الظفير له ورجع بها لربعه ولم ينسى طيب ال سويط وفعلهم الغانم اللي يسطر بماء الذهب …

وسلامتكم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s